ಚಂಡೀಗಢದಲ್ಲಿ ನಡೆದ ಐಪಿಎಲ್ ಪಂದ್ಯದಲ್ಲಿ ರೋಚಕ ತಿರುವುಗಳ ನಡುವೆ ಪಂಜಾಬ್ ಕಿಂಗ್ಸ್ ತಂಡ ಗುಜರಾತ್ ಟೈಟಾನ್ಸ್ ವಿರುದ್ಧ 3 ವಿಕೆಟ್ಗಳ ರೋಚಕ ಗೆಲುವು ದಾಖಲಿಸಿದೆ. ಮಧ್ಯಮ ಕ್ರಮಾಂಕದಲ್ಲಿ ಸತತವಾಗಿ ವಿಕೆಟ್ಗಳನ್ನು ಕಳೆದುಕೊಂಡರೂ, ಐಪಿಎಲ್ಗೆ ಮೊದಲ ಬಾರಿಗೆ ಕಾಲಿಟ್ಟ ಕೂಪರ್ ಕೊನೋಲಿ ಅವರ ಅದ್ಭುತ ಅರ್ಧಶತಕ ತಂಡಕ್ಕೆ ಜಯ ತಂದುಕೊಟ್ಟಿತು.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಗುಜರಾತ್ ಟೈಟಾನ್ಸ್ 20 ಓವರ್ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 162 ರನ್ ಗಳಿಸಿತು. ಈ ಗುರಿಯನ್ನು ಬೆನ್ನಟ್ಟಿದ ಪಂಜಾಬ್ ಕಿಂಗ್ಸ್ 19.1 ಓವರ್ಗಳಲ್ಲಿ 165 ರನ್ ಗಳಿಸಿ ಗೆಲುವಿನ ಕೇಕೆ ಹಾಕಿತು.
ಪಂಜಾಬ್ ಉತ್ತಮ ಆರಂಭ ಪಡೆದಿತ್ತು. 12 ಓವರ್ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ 110 ರನ್ ಗಳಿಸಿದ್ದರಿಂದ ಸುಲಭ ಜಯ ನಿರೀಕ್ಷಿಸಲಾಗಿತ್ತು. ಆದರೆ ಪ್ರಸಿದ್ಧ್ ಕೃಷ್ಣ ತಮ್ಮ ಶ್ರೇಷ್ಠ ಬೌಲಿಂಗ್ನಿಂದ ಪಂದ್ಯಕ್ಕೆ ಹೊಸ ತಿರುವು ನೀಡಿದರು. ಶ್ರೇಯಸ್ ಅಯ್ಯರ್ (18) ಅವರನ್ನು ಔಟ್ ಮಾಡಿದ ನಂತರ, ವಾಷಿಂಗ್ಟನ್ ಸುಂದರ್ ನೆಹಲ್ ವಡೇರಾ ಅವರನ್ನು ಔಟ್ ಮಾಡಿದರು.
ಇದಾದ ಬಳಿಕ ಶಶಾಂಕ್ ಸಿಂಗ್ (4) ಹಾಗೂ ಸ್ಟೋಯಿನಿಸ್ (0) ವಿಕೆಟ್ ಕಳೆದುಕೊಂಡ ಪಂಜಾಬ್ ಸಂಕಷ್ಟಕ್ಕೆ ಸಿಲುಕಿತು. ಕೇವಲ 8 ರನ್ ಅಂತರದಲ್ಲಿ 4 ವಿಕೆಟ್ ಕಳೆದುಕೊಂಡರೂ, ಇನ್ನೊಂದು ಕಡೆ ಕೂಪರ್ ಕೊನೋಲಿ ಅದ್ಭುತ ಆಟ ಮುಂದುವರಿಸಿದರು.
ಕೊನೆಯ 3 ಓವರ್ಗಳಲ್ಲಿ 21 ರನ್ ಅಗತ್ಯವಿದ್ದಾಗ ಪಂದ್ಯ ಕುತೂಹಲಕರ ತಿರುವು ಪಡೆದುಕೊಂಡಿತು. 19ನೇ ಓವರ್ನಲ್ಲಿ 14 ರನ್ ಬಂದ ಬಳಿಕ, ಕೊನೆಯ ಓವರ್ನ ಮೊದಲ ಎಸೆತದಲ್ಲೇ ಕೊನೋಲಿ ಬೌಂಡರಿ ಹೊಡೆದು ತಂಡಕ್ಕೆ ಗೆಲುವು ತಂದುಕೊಟ್ಟರು.
ಕೂಪರ್ ಕೊನೋಲಿ 44 ಎಸೆತಗಳಲ್ಲಿ 72 ರನ್ (5 ಬೌಂಡರಿ, 5 ಸಿಕ್ಸ್) ಹೊಡೆದು ಅಜೇಯರಾಗಿ ಉಳಿದರು. ಪ್ರಭಸಿಮ್ರಾನ್ ಸಿಂಗ್ 37 ರನ್ ಗಳಿಸಿದರು. ಗುಜರಾತ್ ಪರ ಪ್ರಸಿದ್ಧ್ ಕೃಷ್ಣ 3 ವಿಕೆಟ್ ಪಡೆದರು.
ಇದಕ್ಕೂ ಮೊದಲು ಗುಜರಾತ್ ಪರ ನಾಯಕ ಶುಭಮನ್ ಗಿಲ್ 39 ರನ್, ಜೋಸ್ ಬಟ್ಲರ್ 38 ರನ್, ಗ್ಲೇನ್ ಫಿಲಿಪ್ಸ್ 25 ರನ್ ಗಳಿಸಿದರು.